香城茶室 (已結業)

七一公眾假期去香港歷史博物館睇展覽，行完都已經係下午茶時間，不過6:00又有飯局，但又想食少少嘢，最就腳就係博物館內嘅香城餐室。當日咁嘅時候客人真係得3檯，冇人量體溫，入到去座位任揀。去到收銀處點咗個茶餐，沙嗲牛肉米炒配半個奶油豬仔包同火腿奄列，凍齋啡少甜。博物館通行証仲有折。再去搵咗張卡位坐低，放低支ORDER旗仔喺檯面，好快服務員就上餐。喺食物賣相一般同完全冇期望之下，反而有驚喜，沙嗲惹味香濃，米粉爽口唔爛，而且熱辣辣。又係新鮮熱辣嘅奶油豬仔包，香脆嘅麵包外層，鬆軟內層加上牛油和煉奶真係太好味啦。火腿奄列炒蛋非常滑嫩，火腿絲份量滿滿。超滿足。社企食肆服務溫馨，座位同環境都舒適，各位行完博物館不妨支持吓社企。