天下太平 (已結業)

食肉獸XO仔自己一定唔會去食齋，不過Auntie早幾日就已經打電話黎約我，請我試新野，所以就答應陪佢。天下太平既室內裝修簡潔，不過枱櫈都好細張，所以對於身材健碩既我黎講就唔係好夠位，坐得唔係好舒服。友善既姐姐仔好有耐性地等我地決定食乜，重好有心機地解釋個餐牌同介紹佢地既特飲比我地聽：＂有機玫瑰豆奶＂，＂黑糖薑茶＂，＂柚子蜂蜜茶＂。我地兩個最後都係決定食套餐三：湯 + 主菜 + 咖啡／茶 ($88 + 10%)　西蘭花夠薑湯：薑味唔會太重，味道ok啦。好感激廚房攪磨左Ｄ西蘭花同薑，因為對唔係好食菜既XO仔黎講易入口左好多。　菠菜翠玉幾層闊麵：個樣其實幾得，不過食落就好寡好嚡，只可以講句＂唔係我杯茶＂。真係好辛苦先食左半碟；其餘嗰半碟要auntie幫手先清倒。　香茅番茄紅咖哩天虹野菜伴雙色珍珠飯：Auntie叫既，我冇試到，不過佢話ok。　有機玫瑰豆奶：冇糖，好清好健康，不過玫瑰味唔夠重，所以唔夠香。雖然今次唔洗我出錢，不過知道要成百蚊一個人，覺得真係幾貴。