麥菲茶餐廳 (已結業)

之前去過麥菲食tea，發覺佢唔跟牆上餐牌價錢收錢，已經對佢冇乜好感冇幫襯好耐。早幾日揸開車諗住傍晚買外賣返屋企食，見麥菲附近易停車，就幫襯多一次。叫咗兩份常餐外賣自取，外賣加收一蚊，常餐包奄列餐飽湯粉麵同飲品，湯粉麵揀咗火腿通粉。返到屋企打開膠袋先發覺唔妥，唔見咗份奄列，就即刻打電話去麥菲，佢話補番比我，仲話搵人攞上門，問我攞咗地址，連我聯絡電話都冇問就收線。之後諗諗吓份奄列可能成個鐘後先送到，就打開份餐食住先，竟然發現個奇景，塊奄列原來放咗落通粉裏面！真係孤陋寡聞，冇聽過有奄列放湯咁嘅古怪食法！除咗放湯奄列難食之外，個火腿通粉都好難食，個湯有啲似雲吞麵湯，十分古怪。之後等咗成晚都冇人送份正常奄列上門，而我地都費事再打去麥菲追，再冇下次。