百樂小館 (已結業)

朋友約咗食晚飯，佢哋想食潮洲菜，就揀咗之前我食過呢間，商場裡面，新派佈置。開餐前先飲杯功夫茶醒胃。海螺瘦肉雞猴頭菇湯好似屋企煲，料多夠味，唔肥膩，無味精。五香炸芋絲卷唔使點醬汁都已經覺好味，裡面嘅五香粉味同芋頭幾夾，有少少鹹，唔油膩。手打魚蛋津菜煲魚蛋幾彈牙，魚片只係口感唔同，鮮甜又唔腥；津白煮到吸咗 魚蛋嘅甜味，還有炸脆嘅小魚片！滷水鵝肉併盤墨魚彈牙；鵝片略為大件，切薄d 應該會更好；豆腐滑，五花腩夠腍，小肥。家鄉乳香骨即豬扒肉，帶南乳味，唔會炸得過硬，腍軟。豉油皇煎鯧魚塊用咗豉油煎嘅魚塊，要襯熱食，外皮煎到少少脆，魚肉夠大塊，嫩滑，唔會散開。杏汁蛋白芋泥上次已經食過，今晚第二次出擊，唔太甜，杏仁香，蛋白滑，芋泥綿。