花園餐廳 (金百利廣場)

營業中

休息中

上次去旺角鋸咗次失敗嘅扒, 今日決定去銅鑼灣報一報仇!!!!去到餐廳門口, 望入去有好多位, 侍應即刻安排入座, 再睇一睇個menu, 個價同旺角有少少分別, 不過一樣有肉眼, 就叫肉眼!!!肉眼+紅湯+凍檸水呢個配搭係我嘅至愛, 個餐包就都係普通料, 不值一提, 之後個紅湯一到, 嘩... 正呀, 味道對板, 好味... 酸得嚟又有少少辣, 好呀!!!過咗一陣個鐵板都嚟喇, 塊扒大過旺角嗰塊, 同個哥仔講要黑汁, 淋落去等佢"吱" 完即刻開餐, 食條薯條先, 好脆, 仲要係粗波浪薯條, 索咗D 汁, 又脆又惹味!! 之後就係主角, 一切落去... oh... 又係筋??? 又中伏??? 大佬, 唔係咁玩我下話??? 切多少少, 好彩原來得好少筋, 切咗一塊仔入口... 好軟熟, 好有牛味, 而且唔難咬, 咬幾咬就可以嗗一聲就吞咗落肚... 點解同上次旺角嗰塊差咁遠嘅??? 今次係成塊都好正呀, 冇筋又淋添呀!!!!好快就KO 咗佢, 侍應就嚟幫我收嘢同問我要咩餐茶, 杯檸水冇咩好評, 夠凍囉...地方就真係企理, D 伙計又快手, 不過呢間有時會好多人又要排隊搭lift 真係幾煩.