蓮香樓 (已易手) 新餐廳

對上黎蓮香飲茶，已經係十年前。係網上睇到蓮香做到二月底就結業，想帶阿女感受下呢d咁懷舊既酒樓。嘩！一入到去，真係人山人海，又要自己揾位，帶住阿女同大住肚既弟婦，等左半個鐘都無位，最後，有兩個伯伯比左兩個位我弟婦同阿女，我地三個人迫迫到坐。至於，拎點心係要搶。拎到咩就食乜，就係無得揀，實太多人。咖哩魷魚牛筋 - 好好味，唔辣但好香既咖哩味，牛筋好淋又入味。燒肉飲 - 弟婦想食，燒肉唔肥而個皮係勁脆。馬蒂糕 - 好少食蒸既馬蒂糕，好香偏甜，幾好味！棉花雞 - 棉花吸哂d雞汁，勁好味吖！冬菇蒸雞 - 雞肉淋，唔錯！蝦餃 - 皮唔夠薄，但蝦好鮮味，呢個阿女話要食，迫住要搶比佢食！鳯瓜 - 夠淋但唔算太入味。排骨 - 好淋有肉味，我好喜歡！整體好好味，好有兒時既回憶和味道，可惜又少一間懷舊酒樓了！