漁牧 (已結業)

今日同朋友行完Megabox睇下有咩好嘢食，朋友話想打下邊爐，見到一間門面紅噹噹嘅京川粵菜餐廳原來係打邊爐㗎，咁就啱晒啦！仲有雞煲添！餐廳裝修都幾雅致，深紅色嘅裝修完全體現出中國京川粵嘅特色。湯底方面我哋揀咗個滋補花膠雞鍋，有多種唔同嘅藥材同大大件花膠，滋補又養顏。啲雞仲係用新鮮雞，非常嫩滑，而且份量好足，半隻都已經好夠食！職員仲會好細心比個漏斗，等啲沙漏完就可以食啲雞，如果唔係就會太過「鞋」口。原隻鮮魷筒真係原隻上架，好大隻，超新鮮，啖啖鮮味。手打墨魚滑爽口又彈牙。因為朋友都唔係太好肉類，所以揀咗啲蔬菜，叫咗碟白菜仔，未食已經知道好新鮮，啲葉又綠又嫩，唔係誇張，食落仲有菜嘅甜味添，證明真係百份百新鮮。我哋仲點咗兩個小食，鎮江小排骨同青瓜拌海哲，鎮江小排骨酸酸甜甜，青瓜海哲爽口，味道清新，兩個小食都令人好開胃。打邊爐咁熱氣梗係要飲番個椰青啦，清熱解渴，清甜又多汁，仲有一層層椰肉，好易刮出嚟，好甜呀！打完邊爐未夠喉嘅話，職員介紹仲有雙色水晶球做甜品，紅豆沙同奶黃餡嘅糕點，可以點少少糖霜食，再加粒士多啤梨，味道甜甜的，不錯不錯。