鮨芸館 (已結業)

同事話今晚收工係公司附近餐廳食日本料理，我話間間日本野差不多，有咩咁特別呢，同事就話呢間日本餐廳有時令主題，呢期係松葉蟹宴。呢個松葉蟹限定係有好多味菜，每道都各具特色，首先鹽燒松葉蟹係原汁原味，蟹肉入口即溶，簡單鹽味已經帶出松葉蟹既鮮甜味道。松葉蟹卷係蟹膏同蟹肉既結合，所以鮮甜味帶點蟹膏鹹味，同壽司飯既柔軟混合，係幾開胃之選。松葉蟹手卷用上秋田米，非常軟淋淋，又帶飯香，蟹膏，蟹肉同蟹子既三重奏，係紫菜裡面帶出左松葉蟹獨特味道。松葉蟹天婦羅就炸得外脆內軟，蟹殼炸到脆口，可以一齊入口食，超過癮。松葉蟹蒸蛋，蟹肉汁同蛋完全混合，兩者食落零舍夾，鮮甜而蒸蛋口感白滑，實在愛不釋手。冬天又點少得松葉蟹鍋，蟹肉汁滲晒入湯裡面，而蟹香從蒸氣不斷飄起，蟹肉既清甜味完全可以保留。蟹丼係一大主打，外表已經好靚仔，蟹肉同蟹膏配上微熱醋飯，比壽司更實在暖肚，蟹既精華滲晒入秋田米裡面，大滿足呀。