龍寶酒家

營業中

休息中

好多時去酒樓食嘢，如果隔左一大段長時冇去，會發覺好多時換哂侍應，呢間龍寶算厲害，經歷過限枱二人焗住休息多月，一解禁變四人限聚，成個大場爆哂，仲有幾十人圍住個知客等位，亦仲係嗰堆熟口熟面員工繼續做。如果用雪櫃嚟形容呢間分店，入房係蔬果格、近窗邊係雪櫃門、大廳係雪櫃中間幾格，而廁所一定係冰箱。所以無論外面春夏秋冬都請帶外套。此外因為一入門，左面係麻雀房，正面要行一條十幾級樓梯先到食肆位，輪椅唔friendly慎入。最得意係佢下午一點已經係下午茶，而好似大概2點幾又會飛紙仔嚟又有咩特價下午茶，所以貴極有限。枱與枱有足夠空間，所以隔板都慳番，坐得相對鬆動。因為太肚餓，唔等個特價下午茶都係嗌左瑞士汁乾炒肉絲河頂住先，係乾炒牛河feel只係轉左豬肉，鹹淡適宜所以好快𡁻完。之後嗌滋補藥膳鳳爪，得3隻，不過個汁就好濃兼好重藥材味，差啲以為主角係個汁。草菇干燒伊面就鹹左啲，草菇我諗五六粒度。薑汁燉雙皮奶唔覺有皮，薑汁亦薄，不過$12純粹過口癮。