泰Grill (天晉匯)

將軍澳嘅食肆選擇有好多但出色嘅泰菜就好難搵，點知俾我試到一間小店，雖然位置唔係太易搵，但係食物質素超高嘅一間泰國餐廳。舖頭位置唔多，但係都有室內同室外嘅座位，餐廳係用QR code落單，可以對住餐牌慢慢揀想袋啲咩。〈飛天通菜〉有時喺出面食飛天通菜會比較辣，但係呢度就可以選擇辣到，通菜嘅份量好多，而且調味好惹味，好推介！〈串燒〉我哋仲嗌咗半打串燒，仲可以揀豬牛雞每一款嘅數量，好彈性抵讚！因為我同朋友三款都想試吓，所以每款就揀咗兩吋，三款嘅肉一啲都唔嚡，反而想讚一讚嘅係個沙嗲醬，味道同喺泰國食嘅好相似，係比較偏甜嘅一款，沾肉食就更加好味。〈肉碎生菜包〉食泰國嘢又點可以唔買肉碎生菜包呢，同樣餐廳好貼心咁樣可以選擇唔要入邊一啲配料，例如芫荽，啱晒我呢啲唔鍾意食芫荽嘅人，所以食依道菜嘅時候可以更加滿足，肉碎嘅份量超多，多到最後我要同朋友不停淨係食肉碎🤣肉碎嘅調味係有少少檸檬嘅酸味，所以真係會越食越開胃。我同朋友一人嗌咗一杯嘢飲，分別係〈青檸梳打〉同埋〈泰式檸檬茶〉但係估唔到一杯係超大杯，最後我同朋友都飲唔晒，但係味道好正宗，好似置身泰國一樣。