麻痺雞 (已結業)

去到大埔墟火車站博物館附近，有一間非常多人等位嘅雞煲餐廳叫做《麻痹雞》，招牌好有氣派，外型古色古香，座位更有室外同埋室內選擇。任食雞煲有十二款，成人原價每位＄198，兩小時任飲任食全包宴，仲有我最鍾意嘅「支竹羊腩煲」添，不過朋友們都比較喜歡正宗重慶雞煲嘅「麻痹雞煲」底。「麻痹雞煲」三個人就俾咗細煲嘅份量，雞件嘅份量都比較多，而且每一件雞都非常新鮮，肉質非常滑，而且好入味，食完之後忍唔住再encore左一隻，可想而知有幾好味。火鍋配料超過60款選擇，餐紙上食物分門別類列明，客人好容易搵到自己心愛嘅食物，當然唔少得叫我最鍾意嘅豆腐、粟米、蟹柳條、韭菜餃、午餐肉同埋冬瓜等等。當中「韭菜餃」非常大隻，皮薄饀靚，入面佈滿韭菜碎同埋豬肉，食落去非常新鮮好味。牛魔王嘅我當然要追加「手切安格斯肥牛」，份量有大、中同埋例牌選擇，我哋叫咗例牌份量，肥牛條紋非常平均，食落去有好濃郁嘅牛肉味道，唔錯。飲品方面，更有啤酒同埋多款汽水選擇，仲有我至愛嘅樽裝「竹蔗茅根涼茶」。最後三個人埋單，總共都係八百幾蚊，每人都只係$200有多，最重要係雞件非常好食，難怪全店滿座。