四眼佬打冷小廚

營業中

休息中

天氣開始凍，就會好想食下羊腩煲呢一類風味小菜，而諗起羊腩煲，都會諗起大排檔，但係坐大排檔實在太凍啦，所以我哋就揀咗呢間四眼佬打冷小廚，坐喺室內一路食羊腩煲，一路食打冷小菜。雙冬羊腩煲（細） （ $368 ）呢度嘅羊腩煲大大煲，用咗Gas爐一路煲住一路食，夠晒暖身。羊腩夠大件夠厚身，炆得入味，加上夠晒入味嘅枝竹、同埋贈送的大大碟生菜，真係好味又抵食。另外仲嗌左一份打冷必食嘅韭菜豬紅。其實我自己就唔食韭菜嘅，但偏偏就好鍾意食豬紅，所以每次都一定要同朋友一齊先夠膽嗌，否則就食淨晒啲韭菜。呢度嘅韭菜豬紅，豬紅嘅份量非常之多，啱晒我，而且豬紅夠晒滑，湯汁調味亦都非常之濃郁美味，唔錯。另外仲叫咗一份椒鹽墨魚咀，墨魚咀唔係度度都有得食，見到呢度有得嗌，當然叫一份試吓。墨魚咀夠晒大粒，口感彈牙，外層嘅炸漿揸得酥脆，飲啤酒要來送酒就一流。整體來講，呢度嘅食物質素真係唔錯，而且地點非常之方便，鄰近地鐵站，非常適合約一大班朋友一齊嚟食。