龍記小廚

營業中

休息中

老公話朋友介紹，觀塘有間中式小炒幾好，既然去開果邊，咁就去食吓。餐廳光猛乾淨，越夜越多人。餐牌選擇都幾多，樣樣都好想食。最後我哋叫左三款小菜，一個雜菜煲同一個炒飯。金沙蝦球：賣相吸引，剛炸起，熱辣辣。蝦球用左大隻新鮮蝦，口感彈牙，炸粉薄薄，入口鬆脆，好香鹹蛋王味道，好好味。連隔離枱客人都問我哋呢個係咩小炒，佢話下次都要叫呢個。龍記炸子雞：雞皮又薄又脆，唔多脂肪，雞肉嫩滑，調味亦剛剛好，作為招牌菜，我哋都幾認同。海味雜菜煲：海味有蝦同魷魚，另外仲有菇，蔬菜有菜心同白菜仔等，所有食材都係用上湯煮，整體無油，清淡，好夠味道，最後連湯都飲埋，唔錯。菜遠炒安格斯牛肉：牛肉切得厚薄適中，味道濃，有口感，獻汁濃結剛好，唔會一舊舊。菜心炒得夠鑊氣，爽口，估唔到用安格斯牛肉去炒係咁好味。私房蟹皇醬海鮮炒飯：炒飯份量多，蟹皇醬鹹鹹香香，配料有翠肉瓜、蝦同魷魚。炒飯粒粒分明，唔會太多油，加左鹹蛋王一齊炒，鹹蛋王炒到剛好流心，唔會炒到熟透，真心覺得好食。