銘興山西刀削麵 (民泰街)

營業中

休息中

呢間小店經常大排長龍，主打多款特色刀削麵，有湯麵、熱拌同涼拌麵，按個人喜好揀配料、麵底同辣度，除此之外更有小食同特飲供應，價格親民，地點方便，試試無妨。刀削麵口感好彈牙而且好薄身，之前食過覺得冷拌最好味，尤其係天氣熱辣辣嘅時候，配搭青瓜絲、芝麻沙律醬、擔擔醬，味道香濃又惹味。湯麵滑嘟嘟，熱拌更Q彈，各有千秋。小食方面推介花雕醉雞，酒香味超級突出，煮至入味，雞肉嫩滑唔嚡口、豬軟骨，牛筋腩啖啖肉好足料、雞翼同春捲炸至金黃酥脆、仲有新出嘅包皮豆腐都值得一試。