椰林閣餐廳 (已結業)

中學時期好鍾意食椰林閣，三十幾蚊有飯、有湯、有包、有嘢飲，經濟嘅價錢，高級嘅享受，咁啱今日揸車經過麗晶，見到幾款鐵版餐都係六十幾蚊，就決定入去食～我揀咗5號餐，洋蔥汁豬扒拌雞肉串燒，先上個湯同餐包，餐包拎上手係熱辣辣，感覺都叫有誠意，唔係求其，但成餐就真係得個包同凍檸茶叫做ok...😅忌廉湯基本上係乜料都無，而個湯亦都一啲都唔creamy，不過都還好吧，始終我都係想食佢嘅鐵板餐～過咗一陣，鐵板餐都到了，(我掛住同友人討論食物質素唔記得咗影相😭)，豬扒唔韌嘅，肉質ok，係個汁同雞肉串燒出事，雞肉串燒過份調味，食咗幾啖個口已經覺得有啲刺激嘅感覺，因為太咸了🥵！而個洋蔥汁，因為我見到鐵板上有一絲絲洋蔥，同埋餐牌上寫住，我先醒起佢係洋蔥汁，因為個味道同我一路食開嘅洋蔥汁係有分別嘅，呢個汁偏咸，亦無洋蔥汁嘅香，令到塊豬扒都失色埋...食完呢次，我都明白點解椰林閣得返咁少分店了😥