影片
更多
2018-05-31
298 瀏覽
如果將銅鑼灣登龍街稱為「拉麵街」，我相信大家都會有所共鳴，因為呢到既拉麵店愈開愈多，當中大部分都係過江龍，由日本開到黎香港。上星期放假，約左一個大學同學聚舊。我地都係「拉麵控」，所以決定黎登龍街覓食。一轉入登龍街，映入眼簾既就係呢間名為「梅光軒」既拉麵店。我印象中佢唔係開左好耐，應該係新進駐既店鋪，喺日本因爲獲得米芝連既殊榮而收穫左唔少名氣。我同朋友睇見價錢相宜，賣相亦吸引，於是就入去捧場。店內裝潢充滿日本風格，細小而紅彤彤既餐桌令我回憶起曾經到訪過既日本地道拉麵店。牆上貼滿餐牌同埋各式各樣既宣傳單張，為食客推介各種美食如抹茶蕨餅。枱面仲有調味架、筷子筒、牙籤同紙巾。調味架上放滿多款調味料，包括芝麻、辣椒油、乾脆蒜蓉粒、油、胡椒同豉油等等，任君選擇。大家可以因應自己既需要同喜好加入適量既調味料，令食物既味道更上一層樓。餐牌有兩面，用左中文、日文同英文三種語言列出食物名稱，仲附上圖片，非常貼心。拉麵既價錢合理，如果大家想品嚐小食但又怕一份拉麵太多，可以點選半份。由於我同朋友都非常中意食拉麵🍜，所以決定點全份，感覺上更加抵食。醬油拉麵 $75我選擇左傳統既醬油拉麵，亦都係店內推介既一款，聲
上星期放假，約左一個大學同學聚舊。我地都係「拉麵控」，所以決定黎登龍街覓食。
一轉入登龍街，映入眼簾既就係呢間名為「梅光軒」既拉麵店。我印象中佢唔係開左好耐，應該係新進駐既店鋪，喺日本因爲獲得米芝連既殊榮而收穫左唔少名氣。
我同朋友睇見價錢相宜，賣相亦吸引，於是就入去捧場。
店內裝潢充滿日本風格，細小而紅彤彤既餐桌令我回憶起曾經到訪過既日本地道拉麵店。牆上貼滿餐牌同埋各式各樣既宣傳單張，為食客推介各種美食如抹茶蕨餅。
枱面仲有調味架、筷子筒、牙籤同紙巾。調味架上放滿多款調味料，包括芝麻、辣椒油、乾脆蒜蓉粒、油、胡椒同豉油等等，任君選擇。大家可以因應自己既需要同喜好加入適量既調味料，令食物既味道更上一層樓。
餐牌有兩面，用左中文、日文同英文三種語言列出食物名稱，仲附上圖片，非常貼心。拉麵既價錢合理，如果大家想品嚐小食但又怕一份拉麵太多，可以點選半份。由於我同朋友都非常中意食拉麵🍜，所以決定點全份，感覺上更加抵食。
醬油拉麵 $75
我選擇左傳統既醬油拉麵，亦都係店內推介既一款，聲稱係最受大眾歡迎。呢款拉麵正正係喺日本獲得米芝連一星殊榮既醬油拉麵，湯底清新，帶有濃淡適中既醬油味。拉麵煙韌彈牙，軟硬適中。醬油味道愈食愈濃郁，但又唔覺得膩，唔知係咪同加入大量香蔥調味有關，令人食唔停口。
另外，麵內既兩片豚肉好似手掌般大，豚肉既鮮味同醬油香氣相襯，難怪大獲好評。
炙燒五花叉燒拉麵 $98
雖然同樣點左醬油湯底，但呢碗拉麵同上面既醬油拉麵味道不一，師傅選用既配料亦都截然不同。可能因為整體味道偏濃，所以加入左香口既芝麻同埋紫菜。
炙燒五花叉燒既份量亦都好足料，有整整三大片🥓😍 五花肉經過炙燒之後，入面既油脂被逼出，入口既油膩感大大減低。
燒過既五花肉令醬油湯頭帶有濃濃既香烤味道，再加埋溏心蛋、筍同埋其他配料，令到成個拉麵充滿多重味道，我地都好中意呢款別緻既拉麵。
我同朋友各自食完全份拉麵後，已經覺得非常飽，今次無緣再試其他小食。我地對當日既晚餐非常滿意，店員既服務態度親切，又不斷為我地添加茶水，令眾多食客賓至如歸。
米芝連一星呢一個名譽並非浪得虛名，個人認為佢既湯頭同拉麵的確出色。如果想用合理價錢品嚐米芝連美食，「梅光軒」絕對值得大家一試。就算冇米芝連既光環，我都想推介俾身邊既朋友，等大家好似用平價食到有水準既日式拉麵。
張貼
