黑丸嫩仙草 (已結業)

十分鍾情於台式芋圓，個種QQ嘅感覺實在令人再三回味。位於太子哩間台灣過江龍或者可以滿足一下台灣癮。有名叫嫩仙草，所以仙草一定係主打。基本上所有甜品都有仙草，只係配料唔同。試左黑丸嫩仙草，包括芋Q、金薯、紅豆、珍珠、嫩仙草、牛奶。用紙碗裝，同台灣食嘅一樣。芋Q同芋圓唔同嘅地方係粉同芋泥嘅比例，芋Q芋泥份量較多，而芋圓就粉較多，因此口感上芋圓會較為有咬口，QQ的。芋Q果然咬落腍d，食到芋泥，芋頭味重d。而金薯同芋Q一樣，蕃薯味濃。紅豆大大粒，珍珠亦有咬口。王牌嫩仙草好滑，涼涼地，味道清甜，好啱夏天食。加左牛奶令甜品更香滑。味道不俗，幾大碗，兩個人分嚟食就啱喇。不過哩碗甜品除了左仙草夠凍，其他配料都唔夠凍，食得無咁爽。試過芋Q，都係覺得芋圓先係我杯茶。