B&S 西班牙小食坊 (已結業)

中午去人山人海嘅觀塘食飯，東廣場地下都好多選擇，我就揀咗門口果間食西班牙菜嘅餐廳，因為喺門口見到佢入面掛咗好多嘢火腿，好似好專業咁。Lunch time 餐牌上選擇唔算多，有黑毛豬、西冷牛扒、羊扒同春雞。我就叫咗黑毛豬夾心肉，因為大鄉里無食過夾心肉，所以就試一試！一個set lunch 包括一杯細飲品，可以選擇咖啡/茶/橙汁。自己上網研究吓，原來夾心肉係肩胛同梅頭之間嘅肉。估唔到食物好快上枱，兩片夾心肉唔算好大，大約4隻麻雀咁上下，配埋意粉，整體份量偏細，男士可能未必夠食。講翻件黑毛豬夾心肉，其實都幾嫩滑，肉味都好香，食落其實幾似豬頸肉，但係就無咁肥膩。至於意粉，雖然無sauce，睇落又好似好乾咁，但係其實佢係用蒜片同檻欖油炒過，所以食落其實係幾香，又清清地。整體嚟講我覺得都唔錯嘅，至於係咪抵食就見仁見智喇！