王萍記茶餐廳 (已結業)

呢度嘅XO醬豬扒及雞扒飯不嬲係我嘅摯愛...幾個月前見到佢哋關門冇做生意，嚇咗一跳，以為佢哋執咗笠，最後知道原來係大裝修，咁都冇咁驚...一見佢哋開番，就同女友行去食個tea..裝修後光猛咗好多，仲有電視睇添，但個地下仍然係黐立立...餐牌都唔使睇，就叫豬扒飽及凍檸茶...呷一啖檸茶，茶味淡出鳥來；再吃一口豬扒飽，豬扒用鬆肉劑處理過，跟以前嘅水準差天共地...女友叫個茶餐，D腸仔竟夠胆放响D萬年油上面係咁意炸下就算，全冇腸味；隻蛋炒得又油又薄，好似一塊淡黃色嘅紙皮...有冇攪錯...女友越食越火滾，不停地埋怨。小弟今次真係爭佢哋唔落，無言以對...望吓廚房，見到嗰個鐘意一路煮嘢一路擔住口煙嘅大厨仍然係度。冇理由裝修完後水準差咁遠gar...決定暫時唔判佢哋死刑住，揾個下晝食埋個XO醬豬扒飯才可定奪...