大井町日式放題 (已結業)

估唔到200多元就可以食到咁多選擇的放題， 飲品款式多不在話下，而且仲有熱飲，熱飲櫃內有熱維他奶同埋茶類飲品，真係非常少有， 冬天嚟食就更加啱曬， 吧枱櫃仲有幾款自己斟的飲品，有蜂蜜柚子汁、蘋果汁等等，淨係飲品已經多到難以選擇！除咗可以剔紙仔叫野食之外 ，仲有吧檯食物， 主要有海鮮，好似海蝦、青口和大大隻的響螺 ，生果亦有很多款，甜品櫃內的甜品款式又多又colourful,真的很吸睛!刺身款式幾乎一般放題有嘅佢都有,而且樣樣都好新鮮，馬刀貝爽口弹牙，好正。壽司就真係做得非常的骰， 不論係牛油果軟殼蟹卷，鰻魚卷物 或是和牛卷物， 以及一款水晶芒果蝦卷，都做得相當精緻， 尤其水晶芒果蝦卷，口感就更加特別，好有層次，外皮 係水晶皮好精瑩通透，食落好清新。炸芝麻雞翅，有少少辣味， 但係 外皮炸得好香脆，食落香口惹味。燒牛舌都算幾厚切，燒得香口，食落好弹牙， 有啲咬口，唔會乾爭爭，好滿足。鹽燒大蝦， 真係好大隻，有成隻手掌咁大，食放題有咁大隻嘅蝦，真係第一次見， 而且食落好彈牙好新鮮，唔會有任何霉嘅感覺，好好味!飯後生果，菠蘿同蜜瓜都非常鮮甜，正好為呢餐放題解一解肥膩嘅感覺。