叉燒大王

營業中

休息中

記得早幾年興捉精靈，我同太座都當時非常瘋狂，會揸車四圍去玩，有次去到河畔花園呢度，晚飯就入咗去叉燒大王度食，記得當時非常失望，今次係嚟附近搵嘢食，見裝修過同擴充咗咁，一於再試過，入去見都幾滿座，剛剛有一張枱，好彩唔使等，坐低轉頭已經有幾枱客喺門口等位；嚟到當然係要食叉燒，叫侍應整碟靚D淋D嘅俾比卡豬，佢最鍾意食叉燒，睇吓張單真係會寫住肥、靚D、淋D，食一舊簡直刮目相看，真係好味，如果我自己食一定要求有小小燶，不過比卡豬一齊食就唔好喇，佢都食咗一碗飯，可想而知舊叉燒幾得；蒜蓉蒸開邊海中蝦，可以話係我近年喺街食得最好味嘅一次，蒜蓉份量剛好，海蝦非常新鮮唔會梅，要同太座爭食，金銀蛋浸豆苗，蔬菜都係不時不食，豆苗雖然而家四季都有，但冬天仍然係當造，好明顯呢度個貨源揀過，今年食得最靚嘅豆苗；睇餐牌呢度仲有好多特色小菜，我見到有鐵板爆田雞，下次我一定要食呢個!