Café&Meal MUJI (已結業)

九龍灣德福廣場啱啱新開咗MUJI，趁住今日係假期，一早就嚟等佢開門，順便試吓喺度食個靚早餐。由於係新開張嘅關係，10:00一開門就已經有大批顧客光顧，瞬間已經座無虛席，好彩我哋都仲可以享用到頭圍用膳。呢度係用手機點餐，介面非常清晰，簡單易用，然後就可以安坐等待店員送上美食。另外亦都有提供餐牌，咁就可以一覽無遺咁睇吓有咩選擇。首先我哋揀咗一份All Day Breakfast，有Egg Benedict、德國腸、沙律菜、火腿、多士，同一碗穀麥，再配一杯紅茶。份量豐富，沙律菜夠新鮮，我就最愛Egg Benedict，保持少許半熟蛋汁，配埋多士好好味！另外我哋揀咗蟹肉牛油果牛角包🦀🥑🥐，牛角包仍然微暖，足足有半個牛油果嘅份量，亦有好多一絲絲嘅蟹肉，仲配埋新鮮炸起嘅薯條同沙律菜，食完超級飽。仲有叫咗一份兒童餐俾小朋友，同樣咁豐富，有一個Mini Burger、粟米甘荀通粉、生果同果凍，全部都係小朋友鍾意嘅食材，仲附上兩粒MUJI棉花糖，小朋友都可以清晒成份餐，仲話超級好食！好高興喺九龍灣開咗咁大間MUJI，而且仲有埋Cafe，以後一有時間就要多啲嚟朝聖。