豚道樂 (百合苑商場) (已結業)

今日去紅館睇演唱會，記得之前行黃埔見到開左個九號水產，所以就早啲去食左晚飯先。入到去都有四五間餐廳選擇，六點人流不算多，最後揀左食拉麵～呢間豚道樂唔係開放式廚房，所以睇唔到拉麵師傅嘅即場製作。左右兩排吧台，而一個就有個空間畀侍應上菜～每兩個位有凍水，調味料，仲可以自己磨芝麻每一碗拉麵都可以各自選九州系直麵或札榥系曲麵，另外有部份特上拉麵係逢星期五六日限定，特上拉麵會有哂兩塊豬肩肉同豬腩肉，仲有兩塊紫菜同半粒糖心蛋～我就叫左五六日限定既特上海老湯拉麵，麵就揀左曲麵，貪佢夠彈牙同掛湯。湯底非常濃郁，裏面有好多櫻花蝦，每飲一啖湯都會食到。叫得豚道樂就緊係要試下啲豚肉，豬肩肉較瘦而切得夠薄，而豬腩肉就肥瘦均勻，燒得好香。我男朋友就試左特上日本芥末拉麵，一上黎就見到成碗青bb嘅湯，望到都覺得攻鼻。佢要左直麵因為想無咁掛湯，但啲麵都已經煮到全部變左青色！個湯一食落其實無想像就咁攻鼻，香得黎又有少量嗆鼻感，都幾夾。但係食多左就一路keep住攻鼻，我男友都有啲頂唔住，好刺激～糖心蛋既流心感不俗，味道可以中和一下芥末啲刺激感～另外叫左個炸軟殼蟹，新鮮炸出，好脆口～最後見唔少人都叫左呢種梳打，所以都叫左黎