金田日式放題 (已結業)

要訂位都ok既，早2日打電話訂位要房,點知冇房....要排waiting list，都諗住冇得座房... 點知...尋日好快佢已經預到房比我....工作效率非常高~ 6點幾去到~見到環境ok,寬闊,大張椅子舒適。即叫即整已是驚喜,食物更是出乎意料之外,order都算出得齊!吃過某幾間日式放題,tick左唔聲唔聲就變成無供應。三文魚非常新鮮。希靈魚本人唔太喜歡,但朋友話好多魚春好正。甜蝦雖然細隻，但係好新鮮好鮮甜。蔥三文魚手卷,多料,紫菜亦唔腍,很好味。櫻蝦沙律,混入左d芝士味,幾得意。秋都魚,很大條!燒鯖魚好香,好脆!鹽焗三文魚頭,燒唔香,燒香d會好食好多。甘蝦腐皮卷,炸腐皮內,似鯪魚肉包蝦,ok。炸芝士年糕,煙韌非常!吉列蠔,細細粒,但都ok。日式蒸蛋,越底越好味,蛋很滑。胡麻牛舌,賣相馬虎,但肉質爽嫩！蒜片牛柳粒,太熟。薄燒牛肉,軟軟的,好正!大阪燒餅,唔好叫,菜還菜,煎蛋還煎蛋,好炸粉feel添。$200鬆一位,價錢合理抵食。對我這個食物質素有一定要求既人,金田算係唔錯既選擇,比一般其他既放題優勝。刺身款式選擇算不過不失,但勝在新鮮。待應加茶快,有禮貌。