財記海鮮火鍋活魚刺身

營業中

休息中

打邊爐係我最愛菜式之一，成日都心癢癢想食，但好多時得兩個人未能盡興，終於等到今次同好友慶生，一行四人搵左呢間新新地嘅邊爐店。位於埃華街，成條街都係食肆，唔難搵，一連有兩個舖位。入到去更覺企理光猛！今晚約得早，黎到時冇咩人，食食下full house，好彩有訂位。大家都俾呢張刺身同小吃餐單吸引住，既然生日，豪一豪佢，叫半板海膽、每人一隻鹽燒鮑魚試下。上菜都幾震撼！擺盤麻麻，但超新鮮！黎張近照海膽，好鮮甜，完全唔腥，估唔到火鍋店都有呢個水準。呢個椒鹽黃金豆腐，外脆內滑，有咸蛋香，佐酒一流。鹽燒鮑魚，冇諗過大隻得黎入口咁滑咁腍。今晚超豐富，火鍋料大推有白鱔、墨魚滑、蝦滑同手切牛，款款都係水準之上，而且份量多，性價比甚高！