千房 (已結業)

無訂位，唯有攞飛等位。2個人等左半個鐘多啲，Receptionist已經係入座前講清楚，落單之後要等30分鐘，食用時間係90分鐘，計落得1小時左右食嘢。坐好，快快落單先，叫左芝味廣島燒，我同朋友都估究竟係煮好上枱定係要自己動手。原來係煮好左，熱辣辣，芝士融化伴上炒麵豬肉同菜絲，醬料隨自己喜好落多落少。最初唔明白既然已經煮好，點解仲要放係鐵板上，原來可以保持芝士食到尾都係融融地。蒜香烤蝦肉質結實，蒜味濃郁，好好味，可惜得4隻。呢個蒜香牛油雜菌，一般。香脆鐵板餃子真係好脆，餃子饀有點咸，連埋脆皮一㗳咬落去就剛好。其實落單之後要半個鐘對香港人黎講有啲耐，但係見廚師密密手密密手咁整無停過，又真係唔係幾好意思催，隔離枱既情侶或者一班朋友聚會既，都好有耐性咁傾住計等。我同朋友就叫嘢飲吹住水等。侍應未係好熟手，好多嘢要提，例如換碟，上嘢飲，但係佢哋都好有禮貌講唔好意思。座位唔會太迫，啱有時間慢慢傾計食飯hea一晚。