街邊檔車仔麵 (已結業)

早一排早左少少離開監房, 約左友人出黎旺角睇下野, 逛下街, 但喺逛街前師傅都要醫飽個肚先, 於是醒起呢間食店, 加上咁耐冇黎過, 所以決定黎食番餐!入到去即刻柯打野食, 今次叫左米粉, 豬皮, 豬腸, 魚蛋同牛肚! 米粉就冇咩特別, 都算幾好味, 豬皮唔夠爽口, 仲硬硬地, 加上都幾細塊, 差少少啫; 豬腸有少少肥, 但唔會太韌, 夠入味, 幾好; 牛肚唔韌又淋又夠入味, 可以呀; 而魚蛋就實少少, 但師傅又覺得幾好味, 咬口唔差, 得喎! 總括黎講食物水準都仍然尚可, 環境光猛, 不過價錢又加左價, 變相好似冇咁抵食, 埋單好似要廿八蚊, 加左價後一d都唔算平, 未算好抵食! 師傅見咁耐冇黎所以睇下有冇點變啦, 點知變得最多嘅就係價錢, 死未? 笑臉都勉強可以比, 應該仲有下次!