川居雲南風味米線專門店 (已結業)

原本１８蚊三隻的招牌小食蜜川雞已加價至２５蚊三隻４８蚊六隻，半年冇幫襯過琴日再去水準退步，理由係蜜川雞選用的雞翼的皮非常厚，口感肥膩，冇左以前果種既香脆又甜甜地的惹味。幾款湯底之中筆者鍾情於酸辣，但係川居呢間舖的米線味道好得意，筆者帶過唔少朋友去試，食開非正宗雲南風味（酸同辣分開果種）的朋友會食唔慣川居的味道，話唔好食，但係好多本身都幾挑剔同識食的朋友試過川居之後都話好食。個人感覺係雲南米線好講究湯底味道，而川居果煲湯底的酸同辣味係好和諧同埋有層次的。配料方面，個人覺得任何配料選擇都係次要，因為筆者覺得川居的湯底的味道本身好濃，我試過選不同配料夾埋酸辣米線入口，根本係食唔到湯底以外的味道的。順帶一提，川居每碗米線的份量都幾大，如果唔係太肚餓的話，兩個女孩子係可以分享一碗的，而現場所見亦的確有好多情侶都係SHARE一碗再叫小食的。