一品滷水專門店

營業中

休息中

今晚要斬料加餸，見舖頭新開張，仲全場8折，抵！由廚窗外望，有好多選擇，唔知揀乜好，最後要咗半隻滷水鴨、滷水鴨舌、滷水中鵝翼、滷水雞蛋和滷水豆腐，超豐富！滷水鴨 （$75/半隻，未8折）好有份量。師傅刀功了得，每件大小差唔多。鴨脾上一件好香嫩，鴨皮下有少少肥膏，甘香油潤，唔會太肥膩，岩我心水。淨肉就啖啖肉，點啲滷水汁，味道更濃更鹹香；配啲酸汁就酸咪咪，另一番美味。滷水鴨舌（$60/4両，未8折）好肥美，皮滑內爽，色澤深濃，滷得好夠味，唔駛點任何醬汁都好好味，用來送啤酒一流，就馬上開返罐！滷水中鵝翼（$50/3隻，未8折）都好大隻，同樣滷得非常入味，一啖啤酒一啖佢，滋味！滷水雞蛋（$6/隻，未8折）蛋白好有彈性，蛋黃就粉綿，整得好入味，滷水香和蛋香都有，正！大滷水豆腐（$10/件，未8折）外皮柔韌，內裏腍嫩，淡淡嘅滷水味，亦有豆香。