陶園燒臘飯店 (已結業)

今日收工去尖沙咀攞返少少嘢，順便行一行佐敦一帶，忽然醒起有個同事講過附近範圍有間燒臘檔幾出名，即刻問一問佢，原來就係「陶園燒臘飯店」，位置距離地鐵站大約2-3分鐘路程，方便易搵夠晒就腳。除咗燒臘之外，仲有好多唔同嘅滷水，望落相當吸引！餐廳有舊式手寫餐牌，而家真係買少見少～燒鵝呢日叫咗新鮮熱辣嘅靚燒鵝，買到返屋企仲有少少溫度，外皮夠晒香脆，肉質香嫩，一啖咬落去仲有啲肉汁溢出，夠晒過癮！叉燒今次叫咗瘦叉，燒得好靚仔，唔會太乾太柴。以往後生多數食半肥瘦叉，不過而家上咗少少年紀，開始注重健康就會叫瘦叉，食落健康少少！呢到嘅燒味性價比果然唔錯，難怪我只係等咗幾分鐘，已經見到唔少街坊過嚟斬料加餸，人氣唔錯啵！