嘆嘆 (裝修中)

中秋節翌日假期， 咁啱去到黃大仙北館見到呢間餐廳唔係太多人， 就行埋去問下佢有冇位， 跟住門口嗰位後生仔話，暫時未有等一等， 咁好啦，見得一台客喺度等緊應該好快有， 所以我企埋一邊等。 等咗唔夠一陣間有第二個客人同第三個客人嚟問， 嗰個後生仔竟然叫佢哋去另一邊排隊， 我心諗我嚟先你唔叫我排隊， 就咁叫我等等。 最終如我所料 ，所有有排隊嘅人入曬去先到我。 入咗安排極度令人失望，門口嗰位後生仔仲要若無其事， 直到我再開口問先話下張到我。 跟住入去坐低， 叫嘢食係qr code自助落單， 我朋友點咗鐵路便當，份量都ok， 不過最多係鹽酥雞， 炸得比較脆口， 食得多容易口乾。 另外 叫咗一個套餐，一百零幾蚊，包一杯嘢飲， 一個蟲草花雞肉湯麵， 味道就麻麻，不過呢個價錢接受到。 最後留意到原來鐵路便當有兩個選項一個係有特價一個係冇， 最終埋單揀咗冇特價嗰個就變返正價，又係果個後生仔同我講話你唔揀特價嗰個就冇㗎喇。 我都費事同佢爭論， 以後冇下次， 有乜理由特價產品唔係喺菜單上面直接減咗，要喺另一個特價位度揀。 仲有就係一個捲餅可以50分鐘都上唔到， 呢個我當你人多出得慢啲，所以我取消咗唔要。