博多拉麵別天神 (已結業)

呢間位於告士打道嘅博多拉麵別天神已經喺度好多年，有時搭車都會經過見到。呢日朋友話想食拉麵，就試下佢啦～店舖採取先落單後入座，客人可以喺外面部點餐機度點咗嘢食，比埋錢，先入去坐。對於多用現金，冇咩用電子錢包/信用卡/八達通嘅朋友就可能冇咁方便喇。店內面積小小，只有大約十個座位，好彩呢晚客人唔多，唔洗排隊～店家好細心，座位後方有衣架比客人掛褸；座位上方有紙巾供應，方便食拉麵嘅時候可以抹下咀仔👍🏽【蝦味噌套餐配小龍蝦蟹子沙律（$115）】蝦味噌豚骨拉麵 單點 $85呢個勁推薦呀！湯底嘅蝦味好濃，但食得出唔係重味精嗰種。面頭有櫻花蝦，增加口感同蝦嘅香味🦐拉麵麵條整得啱啱好，唔會太淋，口感一流。但都索曬/掛咗啲湯，令到食嘅時候都品嚐到蝦湯嘅味道👍🏽小龍蝦蟹子沙律 單點 $35望落個樣似薯仔沙律，但入面全部都係小龍蝦同蟹子嚟㗎，口感幾得意～【別天神套餐配餃子（$105）】豚骨拉麵 單點 $75呢度嘅豚骨湯係用100%豚骨同純水製成嘅，所以有豐富濃厚嘅豚骨味。唔重味精，所以飲曬啲湯都唔怕呀😋面頭有木耳絲。兩碗拉麵都配以蔥花、粟米同半熟流心蛋，蔥花香，增添口感；粟米鮮甜；流心蛋蛋味濃郁，流心效果一流。