櫻之屋 (已結業)

抵受住埃華街沿路食肆的瘋狂誘惑，直達呢間小店試吓。午巿不設訂位，等位期間已瞄準鯖魚定食同滑蛋豬扒定食。見到實物，忍唔住嘩一聲，真係好靚！豬扒夠大塊，入口夠熱夠脆，肉唔太實，咬得開，醃得入味。滑蛋比較薄身，份量多啲同再滑啲就好喇。蔥花的青綠提升成個賣相，如果可以進一步食到佢的辛香，抵銷豬肉的飽滯，諗落都幾好。鯖魚係最平的午餐，不過呢，好味過奧海城連鎖餐廳的出品。佢煎煮得宜，魚肉唔係又硬又乾，魚皮有少少香脆，沾醬油食好出色，食晒成塊魚都唔覺好油膩。跟餐蘋果沙律夠爽，麵豉湯有滑豆腐粒同昆布，最驚喜係隨餐甜品牛奶公司三色雪糕一球！店員有禮服務周到，一人照顧全場需要，厲害。全日免加一。