牛摩+ (上水廣場) (已結業)

天氣涼涼地就最想食火鍋或者燒烤，今日去左上水牛摩食飯，貪佢依度有又有日式火鍋放題，又有燒肉放題。 6點幾黎到門口已經好多人，等左一陣就有位，最後決定食Lv.2 米國特選和牛燒肉放題 (100 分鐘)。依度座位寬敝開揚，卡位間好一格格，衛生企理，食得安心環境舒適。入去一坐低服務員就放低「牛摩和牛盛 9 品」及「刺身 5 點盛」，賣相好吸引，第一時間就食刺身先，各樣都新鮮，最正就係蝦，肥美鮮甜。 和牛盛9品包括和牛，豬腩肉、豚肉同雞肉。美國進口和牛同豬腩肉，肉質嫩滑，肉味濃郁，油脂分佈均勻，一路食一路令我勾起係日本食燒肉放題既回憶, 肉類既質素同日本食差不多，最特別係雞肉，熊本縣雞爽肉，第一次食雞肉係爽口既。 仲有手羽，海鮮（青口、鯖魚、多春魚）、熟食（天婦羅蔬菜）, 黎到仲熱辣辣，香脆好食。出面有個自助吧，可以拎壽司、蔬菜、日式小食及飲品，款式選擇眾多，二百幾蚊一位，真係算好抵食、質素幾好。