繼光香香雞 (連理街)

營業中

休息中

台灣小食喺香港非常普及，同樣競爭都非常激烈，要喺市場佔一席位，只靠噱頭新鮮感未足夠，質素服務先係王道。        將軍澳屬新區，年輕人比例高，自然有利賣零食。但同樣要面對激烈競爭。繼光香香雞店面簡潔，食物選擇唔多，不過只要有招牌菜，款式唔使多都會生意興隆。呢度提供原味同大中小辣香香炸雞，蒜脆杏鮑菇、葱蒜樂薯、SPA 雞排同飲品。我只鍾情炸雞，今日點咗原味同中辣香香炸雞。作為小食店，應該追求速戰速決，大部份都會整定等客幫襯。呢間店值得尊敬嘅係堅持即叫即造，保持產品質素，而且每炸完一次，店員會即時篩走油裏面嘅渣籽，確保油唔會咁快變黑。炸鍋同客人只用玻璃分隔，整個過程客人可以一覽無遺，亦係店舖自信嘅表現。只見店員將雞塊放入炸漿，令客人最期待嘅畫面即刻出現，就係將雞塊放入滾油，隨即滿鍋翻滾，話咁快就出爐，店員隨即灑上蒜鹽同辣椒粉，即刻有得食。雞件炸得香脆鬆化(亦非常熱氣)，由於油溫高，雞件油份逼晒出嚟，所以香脆不油膩。 整炸雞，人人話手板眼見功夫，但要堅持做好每個細節，持續保持品質，除咗努力，仲要對食物有一份尊重。