茶記冰室 (已結業)

今晚咁凍，梗係食羊腩煲喇，羊腩煮得好淋，好入味，完全冇膻味，其他配菜都好好味，有馬蹄（爽呀）、枝竹，食完個胃溫笠笠又補下身。另外，蒜蓉粉絲蒸蝦，蝦好新鮮，蒸到啱啱好，配埋蒜蓉粉絲一齊食，真係我既最愛！我地叫左半份麻辣雞煲小辣，連爐一齊上，可以一路滾一路食！岩曬咁凍嘅天氣食！用料豐富，有洋蔥、蒜頭、唐芹，仲有超多雞件！小辣的辣度好微，易入口！整體感覺好香口，雞肉又滑嫩！食肉之外都要食菜🤤叫個西蘭花炒花枝片，一上碟就聞到好香蒜蓉味！即叫即炒，熱辣辣！花枝片爽口，唔會好似食香口膠咁，咬唔開，再配搭充滿蒜蓉汁的西蘭花一流！見到個餸名叫千島伴鬼馬咁盞鬼，仲有推介星星，當堂就嗌咗碟嚟試試有幾鬼馬！一上菜就聞到好香千島醬味，即刻就夾咗舊落碗，咬開原來係墨魚膠釀係油炸鬼入面，口感夠哂爽口彈牙，加埋千島醬，送飯一流！另外仲叫咗碟豚肉扒玉豆腐，賣相同menu上張相一模一樣，都係咁吸引！微炸過嘅玉子豆腐外脆內軟，同菜心梅花間竹咁擺碟，面頭再淋上同台式肉燥相近嘅豚肉汁。一碟餸又有菜又有肉，一次過滿足哂兩個願望～