牛牛日式火鍋放題 (北角匯二期)

營業中

休息中

咁啱過北角約朋友收工，大家又想食邊爐，就求其喺附近搵咗間火鍋放題。今次就嗌咗Lv 3澳洲和牛放題，真係和牛食到飽超正，最正就係有MÖVENPICK任食，真係食咗好多杯。今次湯底就揀咗壽喜燒，我自己都極度推薦壽喜燒湯底，仲有隻日本蛋附送，為和牛增加口感同埋風味。‣ 澳洲和牛放題 $298· 澳洲和牛打頭陣嘅當然唔少得澳洲和牛，比起日本和牛相對上冇咁多油花，但同樣都唔會太膩。食落口都好香牛味，因為嗌咗壽喜燒湯底，搭配蛋漿一齊食真係一流，突顯到牛嘅質地，更加滑溜。· 海扇貝＆鳳尾蝦幾鍾意佢啲蝦係去咗頭同埋殼，食落口嘅時候可以啖啖肉，唔使嘥時間剝殼。而扇貝都可以任嗌真係好開心，帶子仲有裙邊可以咬下，我已經數唔到食咗幾多粒。· 明太子吉列蝦＆明太子玉子燒佢嘅明太子吉列蝦幾好食，炸得卜卜脆而又熱辣辣，明太子醬都幾濃郁。而玉子燒都有啲櫻花蝦伴碟，相比起吉列蝦嗰調味冇咁濃，而玉子燒本身口感都比較紮實，鍾意紮實口感嘅人會好鍾意。· 葡撻佢嘅葡撻都幾好食，又唔算好大個，唔會霸咗個肚好多位，打緊邊爐嘅時候有葡撻食都幾過癮。蛋漿唔會過甜，味道適中，值得拎幾個試吓。