十兄弟車仔麵 (已結業)

前排行過灣仔春樹街，見到有間十兄弟車仔麵。本身純粹想食車仔麵，俾呢間店既麵名吸引，叫左個「呢碗唔嘢少」黎食。有哂我最鐘意既幾款餸，香辣玻璃魷魚、鮑汁魚肚、蠔皇紅燒飽魚、日本珍寶蟹棒。有揀餸恐懼症既朋友可以試下佢地幾款招牌車仔麵， 見到隔離碗碗都好大堆頭。散叫每款餸好似無咁低既，所以見到「呢碗唔嘢少」個名咁過癮，就試下咁啦。同埋好少可車仔麵轉烏冬唔洗加錢，咁又幾好丫。真心講，佢既自家辣醬真係辣既，陣辣味起條脷度歷久不散，所以佢地都已經好細心咁分開另上俾你。香辣玻璃魷魚既辣汁令到個湯底好惹味，玻璃魷魚焯得岩岩好，好爽脆。鮑魚同鮑汁魚肚做車仔麵餸當然比較少見，因為鮑魚仔好容易煮得過老，就會好易變得好un。十兄弟呢款剛剛好，想打卡好難唔叫呢款。日本珍寶蟹棒大大件入哂味，配埋個麵一齊食，都幾暖胃。呢間車仔麵仲有其他好多小食嫁，不停聽到好多外賣單，所以夜晚都真係幾旺埸，店面唔係好大，所以我入座無幾耐都Full House左。