焼肉而今 by 富小路やま岸

今日係老公生日，本來想同老公食餐好，點知餐廳服務差，食物又普通。好啦，一坐低，見到個mask case已經有指紋，完全接受唔到一間所謂米芝連餐廳會發生呢D情況。坐左一陣有少少熱，問侍應可唔可以較大少少冷氣，侍應一句話已經最大，較唔到，算啦。落完單後，侍應放低個set lunch，幫我地開左爐。轉頭D肉到左，我地問呢D肉係咩部位啊？個侍應發緊夢，話唔知，大佬啊，就算牛角都會循例介紹下啊，呢間唔係快餐。問完經理後，個女侍應用唔咸唔淡既廣東話介紹左兩款肉之後唔記得第三款係乜。算啦，可能人地係part time，正常既。我地終於開始燒肉，d肉好似燒既都紅紅地，我地問係咪個爐壞左，我明明見到個女侍應已經幫我地開左，問一問，個個人話唔記得幫你地較返大。食物方面，我地叫左極上A5和牛盛合套餐($480)同日替A5和牛套餐 ($290), 另外追加左牛舌（$90），好一般，其實同自己係屋企買和牛用bruno燒無分別。之後我老公想叫檸檬燒酒，個女侍應點左頭，我以為今次終於岩返一次，原來我錯左。個女侍應唔知係聽力定理解能力有問題，幾分鐘後拎左本menu黎。我有少少躁，我話如果你聽唔明，唔該叫你經理落單啦。