餃子店

營業中

休息中

今日又嚟到大角咀，原先想食台灣嘢但係冇開門，於是就決定食餃子。睇見個招牌用張紅紙貼住，仲以為係新開張，後來先知道原來係舊店搬舖。見到店員喺座位上面包餃子，其他店員又不斷閒話家常，好有住家 feel，估計係家人或者親戚檔，感覺親切。呢間最大賣點絕對係價錢平：十蚊就有四隻煎餃，廿五蚊有八隻湯餃，真係好誇張。韭菜煎餃好香口，餡料亦好豐富，可惜放耐咗有啲凍，如果上檯前翻熱一下就更加理想。湯餃我叫咗韭菜餃同椰菜餃雙拼，兩者都好飽滿好好食。值得一提係佢個湯底，除咗有冬菇，冬菜等常見材料外，我居然仲食到唔少乾魷魚絲，既有鮮味又有咬口，唔錯。雖然叫餃子店，但係呢度居然有非常多海鮮小炒，仲有粥粉麵飯，真係唔講得笑。我隔離枱位大隻男就叫咗肉碎蛋炒飯，不斷話好好食，下次有機會真係要再嚟試一試。