證券商協會會所

營業中

休息中

呢度裝修一貫中式酒樓格局，以中環區的樓上會所菜來說，食物水準都算唔錯。都來過幾次，以前市旺時午市是一位難求，但不知原因曾結業，SARS後再開業已經風光不再。可能又因為生意淡薄，據知雖是會所但訂位都不行會員制。今日一行四人來飯局，一時多到來人是不多，都未坐滿一半。午市除了各式小菜亦有幾款點心供應，點心平就十蚊貴就十五，但以前食過水準一般，所以都係叫小菜好了。叫了今天的例湯~廋肉煲山地、半隻炸子雞、浸莧菜、咕嚕肉同涼瓜白飯魚煎蛋，甜品要了雙皮奶。山地湯色水黑色像墨汁一樣，很是嚇人，不過老火山地湯就係咁樣色，飲落夠味道，沒有味精，這個餐前老火湯仍有水準；四個小菜份量不少，四個人食都夠食。炸子雞完全炸熟，口感是差了，但沒有辦法，呢排食雞就係咁樣，但都好肉，味道亦好；涼瓜白飯魚煎蛋亦唔錯，煎得香口乾身，多涼瓜白飯魚亦大大條，是時令菜色；咕嚕肉都不俗，今日的豬肉是肥廋各半，甘美非常，不過怕吃肥肉的朋友會視之為毒藥；甜品的雙皮奶就比以前差了，吃落同蛋白燉奶一樣味，徒負「雙皮」之名。埋單四百幾，中等價錢，地方算好坐，亦可能因為人客不多，招呼都好殷勤。要注意呢度只收現金，不收信用咭。