九重鮮 (已結業)

今日係星期日勁唔想出街，但我又因為朋友出咗街，靚女話要我食飯我冇理由唔出啦，佢好有錢。我地去黃埔九重鮮食完嘢去旺角食雪糕。我地食午市放題，$298一位加一，我地仲加咗$13任飲無酒精飲品。每人都會有一份龍蝦、鮑魚、帶子。任食方面，有海蝦海蜆鮮蠔，但今日唔夠蠔，每人都有五隻，不過餐廳就安排就有任食青口。除咗一啲小食，仲有大量川燒、烤肉、天婦羅同埋銀紙燒。我地兩個肥婆叫咗好多嘢食，我重點介紹幾樣啦。全部海鮮好新鮮，啲蝦同青口仲識郁，生命力頑強。我最中意係龍蝦，啲肉同膏都好鮮甜。今日學到青口身上執毛叫足絲，俾佢捉住麻繩或礁石，抆咗佢就食得。啲蠔都唔錯，但朋友竟然唔食蠔！甜品係椰皇三重奏，好好味！有椰絲、椰漿同埋椰汁啫喱。中意椰子嘅朋友唔好錯過，估唔到咁簡單嘅甜品都好有驚喜！因為唔知乜係銀紙燒，所有我叫咗，其實即係燒銀色嘅紙(錫紙)，店員上菜之後會點火，個火熄咗就食得。幾特別，入面蜆有蝦仲有啲好入味嘅粉絲。其他小食有串燒、烤肉、天婦羅，款式勁多、味道正常發揮，等緊啲海鮮嗰時可以食下！