球哥燉湯

營業中

休息中

食晏時間喺中上環，搵食艱難，要健康加好食難上加難。辛苦搵嚟志在食，終於比我搵到呢間打正旗號賣湯嘅餐廳。 餐廳位於蘇杭街，只做街坊同附近上班族嘅生意，但今日午飯時間已大排長龍，好彩我獨自嚟搵食，比我搭枱慳番輪候時間。店內裝修簡潔光猛，乾淨整齊。 蘋果雪梨白木耳雪茸排骨燉湯配梅菜扣肉$66午市套餐主力係一款燉湯做主力，配小菜或炒粉麵。每日有唔同款湯水，只係今日已經有十五款可以揀😳，果然係專家👍🏻👍🏻今日天氣乾燥，梗要飲碗清潤啲嘅湯。燉湯就係燉湯，湯底濃郁厚實，無三個鐘頭以上火候煲唔出咁醇厚嘅滋味。睇湯料都可見功夫。排骨煲完依然腍滑，飲完無口渴，可見真材實料。梅菜碎切，長時間烹調令梅菜同腩肉都入晒味，傳統客家風格，味重，鹹中微甜，腩肉尚算鬆化，送飯一流。可能個湯太好飲，或者扣肉太好食，令我覺得套餐份量偏少，食完唔夠喉😁對OL嚟講就應該啱啱好。難得出街食晏，有媽媽的味道，希望餐廳快啲開分店，否則下次想飲靚湯可能要排到喊先得喇。