Cafe 360 (已結業)

難得同朋友聚會，搵一間價錢實惠又有格調既餐廳，非Cafe360莫屬！我點左肉醬肉丸焗意粉，附送餐湯同埋飲品（加3元）。價錢68+3=71元，對於一般西餐廳，依個價錢絕對合理，而且水準高。暖笠笠既餐湯，配上脆卜卜既酥皮，係我至愛飲既，其他西餐廳一般都要加配幾十元，所以套餐已經包埋酥皮餐湯，實在超值！肉醬香濃，加上滿滿肉碎，再加埋口感豐富又多汁既肉丸，撈埋意粉真係好易入口，一啖接一啖，停吾到口。其他主食我冇試，但係朋友都一致表示值得推薦，除左魚柳有雪藏味，其他味道對得起依個價錢。小食方面加配左一份薯條，我超愛食依種新鮮薯仔切成條狀，再炸好既薯條，口感厚實又食到新鮮既薯仔味，配合茄汁，滿口香氣。推薦一家大小或朋友聚會都可以黎食，環境同格調都非常舒適，令人坐低聊天不知不覺就過左一個小時。