松記辣蟹

營業中

休息中

其實九龍城都好多嘢食，不過自己一條友食就求求其其得啦。有日經過呢度，發現佢嘅午餐好抵食！佢每個午餐都只係＄45，而且有飲品，堂食仲有湯添～就入去試吓啦！入面座位唔算多，地方都比較逼夾。阿姐就好熱情咁樣叫我隨便坐低。咁我就揀咗一個有電視嘅位啦。我揀咗鹽焗雞飯，首先送上一碗例湯。今日係佛掌瓜豬骨湯，都幾甜幾濃，唔似落咗味精。杯奶茶都幾好，幼滑而且奶味茶味均勻。雖然我已經嗌咗小飯，但係個飯都係好大碟，而啲雞嘅份量誇張。依家＄45係外面真係冇咩食到㗎啦，而呢度嘅雞真係好唔吝嗇咁比你食！雞飯上檯之前淋上秘製醬汁，附送嘅沙薑反而我覺得唔係好啱口味；味道唔係外面平時食開個款，所以我冇點直接食啦。雞肉厚而且都幾入味，絕對夠味唔駛再點沙薑。