Steak Bar (已結業)

今日諗唔到食乜嘅情況下，友人是旦碌咗陣手機，見佢哋而家做緊半價優惠，喺冇特別睇食評情況之下訂咗位了。點知就出事了，同另一用半價優惠食評，同一遭遇。食物嘅份量同menu嘅相相差甚遠，睇相吧。準時到，唔駛等位，直接入座，入面其實仲有位，但就擺咗我坐門口，算唔同佢糾纏，諗住快快手手食完就算。落單時，店員有主動告知用半價優惠，半價吉列炸牛扒定食要按原價另收加一。好，無問題。店員有問要唔要落小食同飲品，睇咗陣，最後冇追加嘢。水都冇比杯。好快嘢食就到，正價份定食叫咗牛舌併薄切牛，牛舌同埋薄切牛得各三片，仲要真係切到超薄果隻！好力工！前菜係醋醃白蘿蔔，唔好食，不吃也罷。過咗陣，半價份炸牛扒定食都嚟度，見到塊吉列時，眼都凸埋，得半塊吉列炸牛扒。所有嘢食嘅味道都好一般，唔會難食，但好食就一定冇佢份。求其食完走算，最後埋完單，我俾張相個女店員睇，問佢其實如果正價叫，個吉列炸牛扒份量係咪都一樣，佢嫌我煩咁hea答我係。是日埋單320，人均消費160。其實咁樣嘅優惠不如唔好做。不會再幫襯了。完。