Saravanaa Bhavan (已搬遷) 新店位置

禮拜六同朋友仔去左尖沙咀位於亞士厘道的Saravanaa Bhavan食印度菜。呢間餐廳由印度人主理，裝修簡潔，露台側邊有洗手盤俾你洗手食野，餐牌有中英對照，點菜時唔使估估下。我地先叫左個North Indian Thali 北印度套餐，呢個餐有瑪沙拉咖喱芝士、 牛油炒豆蓉 、瑪沙拉鷹嘴豆、蔬菜乾、雜菜黄飯、印度烤餅、特製鷹嘴豆酸奶、烤印度薄煎餅、酸瓜、甜品，菜式非常豐富。黃飯炒得好乾爽，d飯粒粒分明，好有咬口；咖喱好香濃，每啖都有好濃烈的印度香料味；烤餅好香牛油味，煙煙韌韌，配合埋咖喱，令人忍唔住食完一啖又一啖！特色煎餅Plain Dosa 原味煎餅 - 煎餅大大份，煎得好均勻，咬落好脆口。隨碟送上四款咖喱，特別推介橙色果款咖喱，辣得黎帶d酸，好開胃。怕辣就可以沾黃色果款醬，唔太辣易入口又帶點椰漿味。南印度甜酸香料湯 - 個湯望落有d似羅宋湯，飲落酸酸甜甜又辣辣地，都幾開胃。侍應仲介紹我地左試下個酥炸花椰菜，唔會好膩，口感有d似魚肉，配合埋d特製辣椒醬，味道不俗，果然無介紹錯。