沙士亞印度餐廳

營業中

休息中

同事帶我嚟呢度LUNCH，我先知原來呢間酒吧下午係食印度野，而且價錢仲好抵😯，最平一個Set Lunch包餐湯同餐飲都只係$68，仲要有豬牛羊雞魚素供選擇，啱哂唔同人嘅需要!! 🙉平日星期三LUNCH，只得我地幾枱客，所以唔BOOK枱都無問題。套餐可以揀白飯或者Nan，呢度唔洗加錢轉就可以食到Nan，我就當然揀佢啦!! 圖中係兩人份量，每人有四塊。暖暖地嘅Nan，齋食會食到好重嘅麵粉味，焦左嘅位置多左份焦香而更好味；口感好煙韌，夠乾身、唔油膩，係一款幾好味嘅Nan😋。食飯嘅同事話我知，D飯好普通，普通到就係平時碟頭飯果D，並唔係印度米。咖哩雞$68望落個盤細細個，但其實無論雞定咖哩汁，份量都好足夠，一個女仔食哂D雞同三塊Nan已經好夠飽🙊。咖哩食落好舒服，香料味唔算好濃、甜甜地、一D都唔辣、鹹度適中。雞肉食落似雞胸肉，肉質比較鞋，但勝在唔韌、唔痴牙，份量多，蛋白質豐富。餐湯係蕃茄菜湯，飲落似落左少少麵粉嘅質地，茄醬味濃，唔係我杯茶。午市除左有套餐外，其實都可以單點主餐牌，不過價錢唔平，同埋份量比較適合Share。餐廳有加一，接受信用卡付款。