Saravanaa Bhavan (已搬遷) 新店位置

其實食印度咖哩都真係第一時間諗起重慶大廈，不過朋友話之前喺雅士利道食過一間都幾好，環境比較寬敞，於是又去試下。餐廳係樓上舖，都叫乾淨企理，只提供素食。我哋叫咗平時比較少見嘅印度芝士煎餅，係一款以扁豆米造嘅pancake，中間包咗d碎芝士。塊煎餅係無敵大塊，成隻紙鳶咁，配上4款醬汁。芝士煎餅就咁食有少少酸酸地，質地都幾軟熟，配上咖哩，又幾好食。其實幾款醬汁我唔係好知係d乜，橙色兩款係咖哩，黃色好似有少許薄荷味，白色就真係完全食唔出。食印度菜又點可以唔食Naan Bread, 食naan 就當然要配咖哩！我哋叫咗個雜菜咖哩，好多青豆！不過青豆之外唔係好揾到有完整嘅菜喺入面，我估計係打成菜茸融入咗咖哩之中。呢個雜菜咖哩都幾辣，食落好刺激，一路用手拎住naan bread, 再沾咖哩食，真係別有一番風味！我哋仲叫咗一款瑪沙拉咖哩芝士，呢一款咖哩相對無咁辣，但就有濃濃牛油味，咖哩入面有一粒粒茅屋芝士，其實都幾特別！今次用餐經驗感覺幾好，食物多選擇，坐位又真係比較舒適，雖然係食素菜，但係可能食物都偏向濃味，所以一d都唔覺得寡！想食素又怕太清無乜食慾嘅朋友真係可以試下印度素食！