彩興來來火鍋 (已結業)

將軍澳近排開咗唔少食肆，行入一啲新開嘅商場，總會發現有唔少嘅新店， 今次行入帝景灣商場，試下呢間彩興來來火鍋，不過商場入口頗為偏僻，比較難搵。 星期六嘅晚上，一入去就有位坐， 唔使等位。 餐牌上有唔少嘅選擇， 聽老闆娘講 ，如果平日星期一至四嚟，仲可以用一蚊嘅優惠價， 試下佢哋嘅胡椒豬肚湯，養生湯底，同埋蕃茄濃湯呢三款鍋底，可惜今日係星期六，未能享受優惠。先上嚟嘅有九宮格醬料，包括 ：辣醬 、麻油、 蔥、炸蒜等等。我就叫咗呢個黃金雞鍋試下，有專人即叫即整，喺客人面前逐樣將唔同嘅材料炒好，煮起個湯底。煮完真係金黃色， 睇落都幾濃。湯入面包括蟲草花、花膠、鮮雞等等。 另外仲叫咗四寶丸，88蚊有四款嘅丸，例如牛肉丸、豬肉丸、墨魚丸、蝦丸。小食就叫咗牛油果芥末牛柳粒， 都幾多牛油果，不過牛柳粒就比較碎，同埋比較多醬。 呢個就係牛舌，食落都幾爽口。另外仲叫咗鴕鳥肉，肉質幾淋。 而珊瑚蚌都幾爽口，烚一陣就食得。至於廣島蠔都幾多粒，不過就有少少腥，不過不失。